HONG KONG
Email: admin@npsl.com.hk
-min.png)
要拎到一個岩心水嘅offer，需要過五關斬六將。除咗要寫好份CV之外，面試表現都尤其重要！面試官會透過每輪面試獲得一啲面試者嘅資訊，從而達到選出合適人選嘅目的，而點先可以喺面試中脫穎而出？嚟緊六大需要注意嘅技巧將會成為你喺Face-to-face面試中過關嘅策略~
1. 仔細閱讀招聘廣告
公司通常會喺招聘廣告入面寫明對合適人選嘅要求。喺預備面試講稿之前，重新並且仔細閱讀一次招聘廣告，有助你準備說辭嘅內容，例如廣告指明需要一個可以喺高壓環境下工作嘅員工，假如你係呢類型嘅人，你就可以喺面試度特別提及自己呢項優點，籍此提高面試成功嘅機會。
2. 事先了解清楚公司背景
面試之前必須做足功課，了解清楚公司資料，例如上公司網站，了解一下公司嘅成立歷史、商業模式同埋所專注嘅產業，有助你喺面試期間有效咁指出自己嘅價值，同埋將來可以對公司作出嘅貢獻。
3. 諗定要提問嘅問題
通常到咗面試嘅最後一個環節，面試官都會循例問吓面試者仲有冇咩問題想問。預先諗定一啲具有意義同價值嘅問題，例如申請職位喺公司嘅前景、公司對合適人選嘅期望等等，一方面表示你對未來嘅積極性，另一方面可令面試官印象深刻，大大提高面試嘅成功率。
4. 展示明確方向
喺面試過程中展現自己係一個對未來目標非常清晰明確嘅人，例如表達自己非常清楚嚟緊入咩職位、自己要行嘅方向、未來要達成嘅目標以及自己未來可以為公司提供嘅貢獻。
5. 恰當嘅應答禮儀及談吐方式
喺面試期間，避免打斷面試官或者參與討論者嘅發言，以示禮貌，亦盡量展現善於聆聽嘅一面，有助將來團隊嘅合作。而喺陳述自己過往嘅成就或者貢獻嘅時候，盡可能具體並加以數字形容，例如增長幅度達百分之三十、成功交易五十單生意等，亦都可以舉實際例子說明。
6. 適當肢體語言
展現適當嘅肢體語言，可以表示自己係一個自信嘅人，避免俾人印象舉止過於僵硬死板。假如太多並且不斷重複嘅肢體語言，例如不斷整理頭髮，則會令人感到煩厭，影響面試表現。呢方面大家要多加注意分寸！
